Mayoria di nos ta busca un persona compatibel pa comparti nos bida cune. Compatibilidad pa mayoria hende ta nifica, cu tin similaridad den pensamento, custumbernan y opinionnan, pa locual ta trata e cosnan mas importante den bida. Nos cada un tin nos puzzel, y e persona cu sa di yena mayoria di e partinan, generalmente ta e persona cu nos ta scoge pa comparti nos bida cune. E partinan cu resta di nos puzzel, nos sa cu kisas nos no lo por haña, pero na e momento di cera e compromiso, felizmente nos ta conforma nos mes.
Pero bida no ta algo fiho, e ta fluctua, e ta cambia, y e partinan cu falta di e puzzel cu nos tawata dispuesto pa ignora, por resulta di ta necesidadnan cu pa nos ta importante. Flexibilidad, creatividad y comunicacion ta necesario, pa nabega e barco den bon direccion.
Comunicacion honesto y habri, ta inclui un di e topiconan di combersacion menos agradabel, cu ta infidelidad.
Infidelidad ta un topico hopi delicado pero na mesun momento, demasiado comun. Mi ta durf di bisa cu 80% di esnan cu drenta mi oficina ta papia tocante un infidelidad cu a sosode den pasado, pero nunca a wordo trata, un infidelidad ta andando den secreto, of cu a caba di wordo descubri, of un infidelidad cu un persona ta conta mi, cu e ta sinti cu lo bai pasa, si cosnan no cambia.
Hopi vez, infidelidad tin di haber cu necesidadnan personal, cu no ta wordo cumpli.
Pero prome cu nos sigui, mi kier haci bo un pregunta:
Kico ta infidelidad?
Pa hopi e contesta lo cuminsa cu: “DUH...”
Pues claro, infidelidad pa siglos caba, ta nifica: “Haci sex cu otro persona cu no ta bo pareha.”
Y contesta aki ariba su mes, ta corecto.
Pero den e era digital aki, na unda e limite ta?
Tin hopi cos cu no ta encera tene relacion sexual, pero cu toch ta keda cuestionabel, p.e:
· Flirting cu otro personanan
· Online dating riba un dating app
· Wak pornografia bo so
· Sexting
· Un 'massage with happy ending'
E contesta riba e pregunta, si esakinan ta infidelidad ta varia di pareha pa pareha. Por ehempel, esnan den asina yama ‘open relationships’ no ta considera e hecho di tene relacion sexual cu otro persona(nan) como infidelidad. Swingers (esnan cu ta intercambia pareha cu otro solamente pa sex) obviamente no ta considera sex cu otro persona(nan) como infidelidad.
E ‘bottom line’ ta, cu locual ta wordo cualifica como infidelidad, ta depende di e tipo di relacion cu bo tin, y principalmente, e palabracionnan haci entre abo y bo pareha.
Pero na unda no ta wordo papia, hende ta bai asumi.
No obstante cu tur hende parce di ta di acuerdo, cu comunicacion honesto ta lo mas importante pa un relacion sano, hopi hende toch ta scohe pa no papia tocante nan necesidadnan. Nan ta prefera di warda, y wak si kizas e pareha mes ta ripara cu algo ta bayendo robez, of ta vocifera nan malcontento na un manera cu ta completamente incomprendibel. Nan ta baha beis riba e pareha of opta pa e famoso ‘silent treatment’, den ambos caso asumiendo cu e pareha mes mester por sa na unda e ta fayando. E pareha, cu no ta consciente di e necesidad aki, ta keda den un incertidumbre y hopi bes ta scohe pa aleha, empeorando e comunicacion.
Di otro banda, bo tin e pareha cu si ta papia, cu si ta splica exactamente kiko ta importante p'e, pero no ta haya oido serca su pareha y ta haya su mes obliga di biba den un situacion, caminda necesidadnan cu p'e ta importante, no ta wordo cumpli.
Y ta hustamente ariba esaki, mi kier enfoca den e espacio aki.
Ta trata aki di personanan cu pa un of otro motibo ta insatisfecho den nan relacion, ta comunica esaki na manera correcto pero no obstante ta keda sinti un bashi den forma di falta di atencion y di comprension. Y e consequencia di esaki ta, cu asina cu un tercera persona duna nan e atencion y comprension aki, nan por cai p’e tercera persona aki.
Y una bes cu nan a cai y e affair a wordo descubri ta bin e pregunta:
“Pero, dicon b’a scohe pa gaña bo pareha, dicon bo no a ‘djis lag'e’?”
Si, teoreticamente bo por “djis lag'e”. E no ta algo imposibel. Pero principalmente pa esnan cu tin un hogar y yiu esaki no lo bin sin su consequencianan. Den hopi caso, no ta e pareha so lo bo laga, lo bo kibra henter un hogar. E hende homber den mayoria caso lo perde su yiunan of en todo caso no lo por comparti mas cu nan bou e mesun dak. E hende muher tambe lo sufri a consecuencia di e resentimento di su yiunan, pa kendenan semper lo keda incomprendibel dicon nan mama a dicidi pa laga nan tata.
Tambe ta hunga un rol, cu pa hopi hende, ainda e parti mas grandi di nan puzzel ta wordo yena door di e pareha. Ta solamente cierto necesidadnan specifico ta wordo cumpli door di e amante. E intencion no ta pa laga e pareha oficial na fabor di e amante, sino solamente pa cumpli cu e partinan cu falta di e puzzel.
E ironia ta, cu den casonan asina, e amante ta mantene e relacion oficial mientras cu e pareha di e infiel ta mantene e affair.
Kiko mi kier bisa cu esaki?
E amante ta zorg pa e infiel haña e partinan di su puzzel cu ta importante pe, y cu e pareha oficial pa un of otro motibo no ta dunando e, y pues, ta zorg pa e ta satisfecho cu su puzzel completo. Di otro banda e pareha oficial, door di mantene e situacion status quo, caminda e no ta dunando di su parti, ta pone cu su pareha ta keda busca e amante pa yena e pidanan importante cu ta keda falta den su puzzel.
Mi intencion ta pa spierta esnan den un relacion, pa e realidad aki na Aruba. Hende muhernan cu ta bisa entre otro, cu e homber no ta atento mas, ni ta worry pa duna afecto, y hende hombernan cu ta bisa entre otro, cu e muher no ta wak e importancia mas, di intimidad y sex.
Claro, cu semper den bida tin cosnan cu ta imposibel. Si e pareha ta sufri di un of otro malesa cronico fisico of mental, kisas temporariamente of permanentemente no ta posibel pa e cumpli cu necesidadnan sexual of otro expectativanan cu su pareha por tin. Tambe por tin motibonan moral pakico un persona desde un principio a nenga di practica cierto actonan.
Locual ami ta papiando di dje, ta locual si ta posibel pero door di simpel negligencia, no ta wordo haci.
Nos tur tin bidanan druk. Pero aunke esaki por zona manera un challenge, ta sumamente importante pa nos keda “involved” y atento pa no neglisha nos relacion.
Si bo ta wak cu bo pareha ta laga slack den cierto cosnan cu pa bo ta importante, pidie explicitamente pa cooperacion. Si voluntariamente e ta ofrece su cooperacion, acepta y aprecia esaki. Si bo ta wak bo pareha cansa, tuma iniciativa y saca un man pa yud’e. Y si bo pareha kier yuda bo, no nenga bisando cu bo mes por haci’e.
Un danki, of otro demostracion di aprecio, no ta mata, ni sikiera si den bo opinion bo pareha simplemente ta cumpliendo cu su deber.
CONCLUSION:
Niun hende na mundo ta drenta den un relacion sin ningun expectativa. Si tawata asina, cu nos no mag di spera nada di nos pareha, nos tur lo keda soltero. Pasobra: What’s the point? Tur hende ta busca un pareha pa comparti.
Comparti cu otro ta nifica: Give and take.
Cuminsa analisa bo mes y bo aporte na bo relacion. Ta sumamente importante pa como pareha boso asumi boso responsabilidad. Wak pa bo ta unda bo mester ta. Make sure cu bo ta comunica abiertamente y frequentemente tocante bo necesidadnan y cu bo ta cumpli cu necesidadnan di bo pareha na e mihor manera posibel.
E yabi pa un relacion sano ta, pa traha hunto, como un team. Expectativanan cumpli na ambos banda, ta aumenta e nivel di felicidad y satisfaccion personal y ta haci cu e otro lo wak e balor di cuida y mantene e relacion.
Mi ta spera cu e post di awe por yuda spierta esnan cu ta bibando cu e ilusion cu un relacion mester funciona ‘di mes’ y sin ningun aporte di nan banda.
Tur cos importante den bida ta exigi esfuerso.
Corda cu bo relacion ta bo creacion.
Pa esnan cu ta struggle cu, of ta premira problema den area general di relacion of cu a haya nan mes confronta cu infidelidad, mi ta recomenda pa no sigui warda pa busca relationship coaching.
Mas info:
Pa esnan cu ta struggle cu malcontento den area specifico di intimidad mi ta recomenda pa mas pronto posibel busca intimacy/sex coaching.
Mas info:
Desiree Swaen
DS Love Coach
WhatsApp Msg: 6615251
E-mail: desiree@ds-lovecoach.com