Bo ta corda e gevoel di barbulet den bo stoma na inicio di bo relacion?
Esaki ta caracteristico pa e fase di ‘passionate love’, cu ta dura un averahe di algun luna pa dos aña despues di a conoce bo pareha. Passionate love ta un estado psychologico cu tambe sa wordo yama: “Infatuation”.
Na ingles, infatuation ta wordo describi como:
“An intense but short-lived passion or admiration for someone or something”.
E fase di ‘passionate love’ ta dominabo completamente. Den e estado aki, bo ta experiencia un preocupacion casi obsesivo pa cu e otro persona; bo no por stop di pensa riba dje. Bo ta admira y idealisa e persona aki te na e extremo, cu bo no ta ripara su fayonan.
Emocionalmente, e estado di passionate love ta caracterisa pa un atraccion sexual explosivo, y un gevoel frecuente di extasis na momento di comparti cu e persona. Ora bo no ta fisicamente cu e persona, bo por experiencia un gevoel di tristeza, cu lo por manifesta su mes asta den forma di dolor fisico.
Na nivel fisico, bo lo por sinti tambe un pulso acelera, sodamento, barbulet den stoma, bloosmento of otro señalnan di excitacion.
Bo hormonanan ta bailando 'rock and roll' y bo no sa kico pa haci cu bo mes.
Mientras cu e sentimentonan aki por ta hopi fuerte den e periodo inicial di un relacion, nan intensidad lo baha cu paso di tempo. Hopi hende ta kere cu na momento cu e fase di passionate love pasa, nan relacion a caba. Mester tin algo robes cu nan relacion, pa cual motibo nan no ta sinti mescos cu na cuminsamento. Nan ta conclui, cu nan no ta stima nan pareha mas, y algun ta asta opta pa laga nan pareha en buskeda di e sentimentonan di excitacion y extasis cu, segun nan, tur relacion amoroso ta ‘suppose’ di tin.
Un di e cosnan mas importante, y na mesun momento mas dificil den relacion ta pa reconoce cu e barbuletnan den stoma, y e estado euforico inicial, no lo keda mescos pa semper, y cu esey ta algo completamente normal.
Manera kisas abo mes por a ripara den bo bida, passionate love ta algo cu ta desaroya su mes prome cu bo conoce bo pareha bon. Durante e periodo aki, lo por tin red flags cu ta wordo ignora completamente, door cu e sentimentonan pa e otro persona ta asina fuerte, cu nan ta strobabo di mira e persona pa ken e ta realmente. Mescos cu den bida en general, den relacion no tin ningun garantia. Pero un cos ta sigur:
E estado di ‘passionate love’ ta carece di logica.
Door di esaki, hopi hende ta tuma decisionnan impulsivo pa formalisa nan relacion den un convivencia of matrimonio den e estado iracional aki, ignorando advertencianan obvio pa futuro problemanan di relacion of un relacion toxico of abusivo.
Si abo cu ta lesando, ta den e fase di dating, mi recomendacion ta:
Play it safe, y tuma bo tempo pa conoce bo pareha bon prome cu bo formalisa bo relacion.
Y awor abo, cu a formalisa bo relacion varios aña pasa. Con bo ta sinti?
Hopi ta esnan cu ta bin cerca mi netamente pa e problema, cu nan relacion ta parce di a 'doof uit'.
Nan ta djis “ok”, cu e rutina diario, y e monotonia di bida.
A lo largo en berdad bida ta bira un rutina cu nos ta cumpli cune casi manera robot. Lanta mainda, hiba yiunan scol, bai traha, busca yiu for di scol, lunch, traha, bin cas bek, cushina, laba paña, ruim op of haci cas limpi etc. No ta resta hopi tempo pa recreacion propio y ta bira un challenge pa duna atencion na bo pareha. Y e consecuencia di esaki ta cu pa hopi, nan relacion a bira 'laf'. Algun hasta ta remarca cu nan ta sinti cu nan ta bibando cu nan miho amigo of amiga.
E bottomline den tur esaki ta, cu na mesun momento, cu hopi ta remarca cu nan relacion a bira laf, ta falta excitement, falta aventura etc., ta bin resulta, cu nan ta hinca den un comfort zone, na unda nan mes no ta dunando suficiente atencion ni aportando suficiente na e excitement y aventura cu nan lo kier mira den e relacion.
Pues, ta sinta warda pa e pareha take action y si esaki no pasa, ta culpa e pareha p’e monotonia den relacion y ta nenga di wak nan mes den spiel, pa no tin mester di enfrenta nan propio negligencia.
E otro extremo ta e pareha demasiado ‘clingy’ cu ta exigi atencion 24 ora pa dia. Hopi bes ta trata di un persona cu tin miedo di abandono. Panico pa un relacion termina, al fin y al cabo no ta faborece ningun relacion. Hinca bo pareha den un prison, caminda e tin cu dedica su bida completamente na abo, lo caba sigur den un of otro forma di rebeldia, pa libera su mes di un control insoportabel. Esaki a lo largo tambe lo conduci na alehamento.
Caminda cu panico no ta faborece ningun relacion, un tiki miedo p’e caba abruptamente, ta e ingrediente perfecto pa mantene e motor cendi.
Kico mi kiermen cu esaki?
Tin un dicho na ingles cu ta bisa:
You don’t know what you got ‘till it’s gone.”
But when it’s gone, it’s often too late.
Cuminsa imagina bo e scenario na unda bo pareha ta djis cana sali for di e porta y bai lagabo sin wak atras.
Pasobra e scenario ey ta e unico scenario cu por sosode den bida real. Tur otro cos ta un ilusion. Cuminsando cu e ilusion, cu bo pareha ta bo “media naranja”, pues cu una bes e compromete su mes cu bo el a bira di bo y nunca e lo bai laga bo. Esaki, pa romantico cu e por zona, no ta realistico.
Bo pareha ta un individuo ariba su mes, doño di su mesun curpa y doño di tur su actonan. E tin dos pia pa e por cana, y core bai, si ta necesario. E idea ey caba, lo mester lantabo fo’i soño y ponebo realisa cu conkista no ta algo pa neglisha, sino un esfuerso diario. Bo trabou pa conkist’e no a caba na momento cu boso a compromete. Es mas, nunca bo lo keda cla di conkist’e. E ta un trabou diario cu e meta pa convenc’e pa keda comparti su bida cubo. Pasobra aunke abo lo por sinti diferente, e escogencia pa keda cu bo ta completamente di dje. Y e escogencia ey por cambia.
Banda di esey, ta importante pa bo realisa cu nunca lo bo conose bo pareha 100%.
Compara e scenario aki cu un ijsberg. E parti mas chikito ta e parti superficial, y esey ta e parti cu abo conoce. Pero tin un parti invisibel, cu yama e mente. Eyden e tin tur su ideanan, deseonan y fantasianan warda.
Interesa bo mes mas pa explora locual e tin den mente. Lo bo realisa, cu ainda tin hopi pa descubri.
Mi intencion cu e topico aki ta pa lanta bo fo’i soño. Locual mi ta bisa ta a base di experiencianan real di pareha. Hopi relacion ta caba pa motibo di negligencia. No laga esaki ta bo caso. Tuma tempo pa comunica y conecta cu bo pareha door di desconecta for cosnan cu ta distrai bo di locual ta berdaderamente importante.
Tempo ta valioso, inpagabel y e ta algo cu nunca bo lo por recupera.
Mi ta spera cu esaki por a sirbi pa spierta esnan cu ta bibando den un comfort zone.
Pa nan por haya un perspectiva diferente y realisa cu tur locual ta importante den bida, ta exigi esfuerso.
Y esaki ta conta sigur, pa bo relacion.
Pa esnan cu ta struggle cu burnout den area general di relacion y kier mira un solucion, mi ta recomenda pa no sigui warda pa busca relationship coaching.
Mas info:
Pa esnan cu ta stuggle cu burnout den area specifico di intimidad mi ta recomenda pa mas pronto posibel busca intimacy/sex coaching.
Mas info:
Desiree Swaen
DS Love Coach
WhatsApp Msg: 6615251
E-mail: desiree@ds-lovecoach.com