top of page
  • Writer's pictureDesiree Swaen

DI 'MUCHA TIMIDO' PA SEXPERT

Updated: 2 days ago

Picture by ARTN Photography


Varios bes mi sa tende via via for di conocirnan, cu 'otronan' a puntra of remarca: Ta con 'net Desi 'por a bira un sex coach?


Ironicamente ami mes nunca a yega di haya un pregunta of remarke.  


E titulo corecto ta hopi mas amplio: Love & Relationship Coach, di cual sex coaching ta un di e ingredientenan.


Pero pa e blog post aki mi lo focus ariba e parti di sex coaching y con esaki a inicia y desaroya.


“E tawata un hende asina keto, verlegen...”


Si, mi ta corda e mucha muhe keto y timido ey, cu no tawata durf di expresa of defende su mes. Wel, e no tawata facil.


Bira un sex coach cu por papia abiertamente tocante sex dilanti miles di hende ariba Facebook no a pasa di un dia pa otro.


Na juli 2016 mi a dicidi di sigui mi calling cu a hibami den e ramo di coaching di relacion. Na momento cu mi a caba mi estudionan di Hulanda y di Merca, mi no tawata sintimi completamente prepara. Tawata falta algun ‘building blocks’ importante, pa completa mi plan, pa DS Love Coach por ta: “the place to be for healthy relationships”. Esey ta nifica cu ami lo mester ta ekipa pa yuda cualkier hende, cu cualkier tipo di relacion y cualkier problema di relacion cu por tin. Ta imposibel pa mi por considera mi mes un coach di relacion y mi no por guia mi clientenan pa cu problema di intimidad y sexualidad. Conocemento den area di sexualidad humano tawata un must pa mi. Y e informacion cu mi a ricibi den mi estudionan pa coach di relacion tawata hopi basico, conservativo y pa mi gevoel no suficiente.


Sondeando oportunidadnan online, mi a opta pa e estudio di Tantra Sex Teacher.


Mi tin cu bisa, cu esaki tawata un di e miho desicionnan cu mi por a tuma pa mi mes y pa mi carera. Mi por a conta cu Samara, mi mentor personal, cu tawata challenge mi pa traha riba mi inhibicion. E berguensa ey, cu hopi di nos conoce, y cu a wordo hinca den nos for di chikito. Pa mi, cu a lanta cu un wela conosi como 'pilar di misa' y kende a bai un scol den porta di misa y cantando den koor, participando den practicamente tur evento religioso cu por existi, esaki te na grandi ainda tawata causa cierto angustia y ansiedad.


Cu cada capitulo, Samara tawata bai mas profundo.


“Hoe voelt het om sex te hebben met jezelf?” tawata un ehempel di e tipo di preguntanan cu e tawata haci, y “doorvragen” tawata su specialidad. E tawata exigi mas y mas y tawata encurashami, y basicamente tortura mi pa bai mas den detayes posibel. Despues el a dunami di conoce, cu e intencion tawata pa pusha mi pa habri mi mes y ta vulnerabel, te na e extremo caminda mi a logra saca tur berguensa cu mi lo por tawatin. Ehercisionan cu mi mester a haci, mester a wordo describi graficamente, como tambe tur e sensacionnan di placer cu a bin cu cada un di nan. Pa mi examen final mi mester a traha un manual di Tantra Sex pa studiantenan, cu portret y todo, describiendo den detaye con pa practica Tantra Sex.


Tur esaki, combina cu terapia psicologico cu mi a tuma pa ansiedad, a haci cu na cierto momento mi por a logra sinti mi mes suficientemente comfortabel .


Net despues cu mi a completa e estudio aki mi a cera conoci cu Julisa Hoevertsz, conoci actualmente pa su programa Morning Muse na Canal 90, y e tempo ey, pa su programa The Morning Show na Top 95. Nos a ‘klik’ mesora, y asina Love Talk a nace, un segmento semanal tocante bida, amor y relacion. Bastante bon mucha y PG-13, cumpliendo al pie de la letra, cu e reglanan estricto di radio difusion.


Despues di algun luna, Julisa a puntrami si mi ta durf di bai un stap mas leu y hiba un conversacion cune tocante sexualidad. Su idea tawata pa hacie como un live riba Facebook den oranan di anochi, pa asina nos tin mas libertad den tema di conversacion. E concepto tawata simpel, pero hopi realistico: Dos amiga combersando tocante temanan taboo, acompaña den background pa nos ‘elemento masculino’, nos ‘mystery man’, kende tawata aporta cu comentarionan for di perspectiva masculino.

Mirando cu After Dark tawata un programa cu un contenido cu e tempo ey ainda no tawata existi riba ningun plataforma na Aruba, mi tin cu admiti cu, mescos cu Julisa tambe a yega di remarca, mi tawata nervioso, principalmente pa e critica cu nos tawata spera di haya den un comunidad 70% religioso.


Pero sorprendentemente, e support masivo cu nos a haya a demostra todo lo contrario. Tawata parce manera cu nan tawata wardando ansiosamente ariba un hende pa habri e combersacion.


Mi sed pa mas conocemento a wordo alimenta grandemente y mientras nos tawata transmitiendo After Dark, ami tawata studiando den e ramo di sex coaching. Y na augustus 2019, prome cu e di 2 season di After Dark a start, mi a logra completa e estudio di Certified Master Sexpert.



And the rest is history.


Nos a completa 4 seasons di After Dark na 2019 y 2020, a pesar di un pandemia cu a stroba nos bastante, pero nunca a logra stop nos. Nos a trata entre otro, e topiconan: Fantasia Sexual, BDSM, Erotic Talk, Foreplay, Backdoor Play, Infidelidad y Sexualidad, Kinky vs Vanilla, Sex Positivity and Open Relationships, Boundaries & Taboos, The Big O, Sexual Orientation 101, Tantra y Kama Sutra, entre otro. Tambe nos tawata tin e placer di por a combersa cu representantenan di 2 grupo di swingers na Aruba den e episodionan Swingers part I y Part II. Tur e videonan ta den e videos section ariba Facebook page DS Love Coach.    


No solamente e conocemento profundo di entre otro anatomia humano, tecnicanan, atraccion, seduccion, deseo, pasion y placer, pero tambe e proceso mental extenso cu ami mes mester a pasa door di dje, a haci posibel pa finalmente mi por a hala un banda tur e fabulanan cu di chikito a wordo hinca den mi cabes.


Mi a bin realisa, entre otro:


  • cu e gevoel di berguensa tocante sexualidad no ta algo inherente na mi como persona, pero a wordo implanta for di chikito den mi door di otronan, cu e intencion di protegemi pa no bai den ‘mal caminda’;

  • cu na su momento, esaki por tawata un metodo efectivo, pues el a logra hinca den mi e miedo necesario, pa evita cu mi a haci ‘fout’;

  • cu como adulto mi a puntra mi mes varios bes ki funcion e berguensa aki tin eigenlijk y si e no ta mas bien un forma di manipulacion;

  • cu como hende muher mescos cu hopi otronan, for di chikito m’a wordo programa door di sociedad en general, cu e mision pa ta un mama y ama di cas (hungando cu wieg, popchi, tetero, planchi, weya etc.) y casa (preferiblemente keto, sumiso, servicial y obediente) y pa 'tone down' y sconde mi poder femenino y sexual pa no provoca hende homber;

  • cu mi tin e capacidad pa ta mi mes y tuma desicionnan independiente tocante mi curpa y mi sexualidad y e rumbo cu ami kier hiba mi bida, sin cu esaki necesariamente tin di afecta otronan.

  • cu gevoelnan di deseo y placer, no ta cosnan 'malo' , 'perverso' of 'peligroso' cu automaticamente ta dominami of controlami, pero ta gevoelnan humano, cu ami por maneha na un manera racional, tanten cu mi ta consciente di nan y ta accepta nan como parti di mi naturalesa;

  • cu ami mes a experiencia con e berguensa aki a infiltra den mi relacionnan anterior y tambe den mi matrimonio, den cual m’a hiba cumi e miedo implanta, cu a traha mas bien contra-productivo y a pone cu mi tawata blokia, reserva y sera pa ta berdaderamente intimo y vulnerabel cu mi pareha;

  • cu den mi experiencia como coach di relacion mi a bin ripara cu no ta ami so, pero cu hopi hende, particularmente hende muher, ta sinti e mesun gevoelnan aki di inhibicion y di no por habri nan mes completamente pa experiencia e intimidad real y placer completo cu nan pareha;

  • cu aunke ainda tin hende cu ta kere cu no ta asina, intimidad sexual ta algo sumamente importante pa mantene e coneccion y compromiso den un relacion di pareha.

  • cu si esaki ta ponebo sinti nervioso of incomodo, kizas por ta ora pa bo bishita un 'sex coach'....?


Jokes aside, e area aki di mi trabou ta uno sumamente importante.


E no ta un simpel titulo cu ta wordo uza pa publicidad of pa yama atencion.

E ta un trabou real ariba un nivel profesional.

El a cambia mi bida y ta transformando bida di hopi hende cu ta sinti cu nan mester wanta hopi cos pa nan mes y no por papia cu nan pareha tocante sexualidad, pasobra esaki ta algo cu nunca nan tawata mag di haci.

E ta nifica trese parehanan mas cerca di otro, habriendo nan mes pa conversacionnan ariba un nivel hopi mas profundo.

E ta nifica durf di papia di detayes sumamente intimo, dunando e espacio na e pareha pa duna y haya informacion, incluyendo deseonan, expectativanan, necesidadnan y otro temanan cu nunca antes a wordo toca.

E ta nifica conoce y acepta mi mes como e ser humano imperfecto cu mi ta, pa asina mi por compronde otronan en bes di husga nan.


Siguiendo e pasonan di Dr Ruth, mi inspiracion, cu na edad di 52 anja a cuminsa cu su programa: “Sexually Speaking”, y actualmente tin 95 anja di edad, y tanten cu Dios ta duna mi bida y salud, mi no tin ningun intencion di retira.


Mi trabou no ta djies algo pa gana placa cune ni solamente un 'hobby' of 'pasatempo'.

Haci e trabou aki, pa mi ta un inmenso placer.


Coaching di relacion ta mi 'calling', mi proposito y mi pasion.


Pa mas informacion tocante mi servicionan di coaching specializa den area di intimidad:


Pa mas informacion tocante mi online educational platform, Love & Life Academy cu un seleccion amplio di cursonan tocante intimidad y sexualidad:


Desiree Swaen

DS Love Coach

WhatsApp Msg: 6615251

448 views0 comments

Recent Posts

See All

Comments


bottom of page