DS LOVE TALK BLOG: Yin Yang Den Relacion

Updated: Aug 17

by:

Desiree Swaen

Certified Relationship & Love Coach




Na comienso di mi carera como Love Coach mi a sigui un estudio cu a certificami como Spiritual Coach. Aunke cu mi no ta propaganda mi mes como tal, mi ta haci uzo di mi conocemento den area spiritual y experiencia propio cu spiritual awakening pa, entre otro, yuda parehanan compronde e influencia di energia masculino y femenino ariba nan relacion.


Ora nos papia di Yin-Yang prome cos cu bo lo pensa ta ariba e symbolo blanco y preto cu un wave den e centro y un punta chikito blanco den e parti preto y un punta chikito preto den e parti blanco. E symbolo aki di origen Chines ta wordo hopi uza den entre otro Feng Shui y Tai Chi. Den cuadro personal y di relacion, por bisa cu Yin ta simbolisa e energia femenino y sumiso, mientras Yang ta simbolisa e energia masculino y dominante.


Na momento cu nos nace, nos tin ambos energianan Yin-Yang den nos curpa, balansa perfectamente y corectamente pa nos por a funciona como sernan completo.


Eynan ta unda sociedad ta drenta y cambia e direccion organico cu cos mester a bai. For di chikito nos ta wordo forsa pa pusha e energia opuesto ful afo y cultiva solamente esun corespondiente na nos genero di nacemento.


Si bo a nace den mi tempo (40+ aña pasa), cos lo a bai asina:


Si bo a nace muher, generalmente nan lo a siñabo bisti “manera mucha muher”, preferibel color roos of pastel, cu shimis of saya, cabey largo cu paardestaart y strikjes, etc. Bo lo mester a hunga cu popchi, preferibel un baby cu wieg y tetero cu ta preparabo pa bo futuro como mama. Bo lo a mag di yora y expresa bo zwakheid pasobra esaki ta normal, bo ta un ser super fragil cu mester wordo cuida y protegi. Bo lo mester tawata keto y obediente y bo sexualidad ta algo sumamente priva; es mas, ta absolutamente inapropia pa bo demostra cu bo ta sinti placer sexual. Preferiblemente bo lo mester tawata mas sumiso y dependiente posibel. Esaki ta hacibo ‘femenino’ suficiente pa mas laat den bida bo por atrae un homber masculino, cu lo por protegebo y cuidabo, pa forma un pareha cu e meta di procrea.


Si bo a nace homber, esaki ta nifica cu bo mester comporta bo mes “manera homber”. Bo mag zundra, bringa y expresa rabia y control. Pero bo no mag di yora. Esey ta reserva pa muhernan, cu ta e sernan zwak y fragil. Bo mester hunga polis, soldaat, cowboy, preferibel weganan violento cu arma, pa di chikito bo siña defende bo mes y demostra bo poder. Bo mester percura pa bo blof y demostra fortaleza na tur momento. Locual ta nifica, cu bo ta wanta bo realidad y tur bo emocionnal paden. Bo no mag di mustra zwak. Un homber no ta pidi ayudo. Bo ta deal cu tur bo problemanan bo mes. Bo sexualidad ta algo completamente permisibel, pues ta homber bo ta y bo tey pa procrea. For di jong bo ta wordo hiba na prostituta pa bo prome experiencia sexual y pa bo compronde cu awor bo ta un homber hecho y derecho, manera cualkier muher mester, pa protegele y cuidele den un relacion di pareha.


You get the picture. E approach aki a pone cu cos a bai completamente fo’i man. E Yin den e Yang, y e Yang den e Yin (simbolisa pa e puntanan chikito den e simbolo), a bai ful perdi door di reglanan di sociedad. Consecuentemente, homber y muher hopi bes no por compronde otro pasobra e parti opuesto den cada un a keda falta.


Den relacion di pareha, e Yin-Yang ta traha di tal manera cu, dependiendo cua energia ta prevalece den e hende muher of e hende homber, e persona ey lo ta esun dominante den e relacion.


Mi por corda mi propio caso. Ora mi a cuminsa date, mi tawata un ser super femenino, keto y sumiso, mayoria bes, pa evita problema. Pa motibo di relacionnan, caminda mi a sinti cu constantemente mi tawata wordo controla y domina – y hasta verbalmente abusa – door di homber, mi a dicidi na cierto momento, cu mi no ta tuma ningun mal trato mas di ningun homber cu kier bin impone su mes riba mi. Mi energia a bolter completamente for di un Yin den un Yang ultra dominante. Mi tabata clash principalmente cu parehanan hopi machista. Esakinan no tawata dura largo den un relacion cumi pasobra mi no tawata accepta dominio di nan parti; mas bien ami tawata purba di domina nan.


Na cierto momento mi a haya un homber super bon hende, e persona ideal den mi concepto, pa comparti mi bida cune. E tawata un persona hopi ‘laid back’ y complaciente y no a tarda mucho cu mi ‘control freak’ a sali y mi a cuminsa dirigi y manda den nos relacion. Na cierto momento, mi pareha tawata pidimi permiso constantemente y puntrami cada rato kiko mi kier pa e haci. Esaki a lo largo a cuminsa irritami, ya cu ‘deep down’ toch mi tawata desea di tin un homber band’i mi, cu tawata firmemente para den su sapatonan. Mi no tawata sa cu ta ami mes tawata e causa di e situacion aki.


Den relacion, e Yin ta ahusta su mes na e Yang, pa cos por keda den balans. Como cu den mi persona e Yang tawata domina completamente, e Yin a bai domina completamente den mi pareha, pues esencialmente den nos relacion, ami tawata eherce e cualidad dominante masculino y e tawata eherce e cualidad sumiso femenino. Y esaki bo ta mira den hopi relacion. Na unda e muher ta dominante, e homber ta keto y sumiso. Y na unda e homber tambe ta dominante ta pelea so tin. Pesey ta importante pa tin un balance interno den bo propio Yin-Yang y den esun di bo pareha tambe.


A keda na ami pa resolve e problema door di haya un balance den mi mes pa na su momento mi pareha por ahusta su energia na esun dimi. Mi a cuminsa pa puntra mi mes dicon ainda mi ta sinti cu mi mester domina e situacion den e relacion aki, na unda actualmente mi no ta cu un pareha cu ta purba dominami. Dicon mi necesidad pa tin tur control den e relacion aki? Esaki kizas den pasado lo tawata necesario pa mi por a defende mi mes, pero cu mi pareha actual, no ta asina. Mi a dicidi pa ‘put my guard down’ y a cuminsa laga mi pareha tuma algun decision ariba su mes, confiando cu e lo sa di zorg pa cosnan bai bon. Esaki a haci cu el’a cuminsa haya curashi pa ‘take charge’ mas frecuentemente, sintiendo sigur di su mes, y mi a sinti tambe cu e peso di mester zorg pa tur cos a kita for di mi lomba. Mi por a relax y laga e handle varios cos.


Esaki naturalmente no ta nifica cu ami no lo por handle e mesun situacion. Pero cu mi ta escoge pa parti e trabou y laga e handle cierto cosnan. Door di haci esaki mi ta sinti cu e ta un partner igual, y cu mi por depende ariba dje, mescos cu e por depende ariba mi. Dicon? Pasobra nos ta partners den bida y den relacion. Si ami mes tin cu handle tur cos y depende solamente riba mi mes, mi no tin mester di un partner. Y mi ta haci mi pareha sinti cu e no tin un funcion den e relacion, cu e no ta necesario, ni util. Y e actitud ey ta funesto pa cualkier relacion.


Desiree Swaen

DS Love Coach

Certified Relationship & Love Coach

30 views0 comments