RECONOCE RED FLAGS DEN RELACION

Pa mantene un conexion saludabel y positivo den bo relacion, ta crucial pa reconoce red flags

(señalnan di alerta).

Aki ta sigui 10 posibel red flags pa considera:

1. Falta di comunicacion:

Comunicacion ta esencial den cualkier relacion. Si tin un falta constante di comunicacion habri y honesto, parehanan lo bai asumi y esaki a lo largo lo bai ocasiona malentendido y malcontento. Ta importante pa traha tempo pa comunica cu otro sin wordo stroba door di social media, colega di trabou, otro miembronan di famia of amistades. Siña bo yiunan for di tempran, pa respeta “mom and dad time”, pa garantisa e privacidad di pareha cu ta necesario pa mantene un bon conexion intimo. Pone limite pa bo mes y pa otronan na fabor di bo relacion.

2. Caracter controlador:

Un partner cu constantemente ta purba dirigi y controla e relacion y cu ta comporta su mes di manera dictatorial, bisando bo kico bo mester bisti, con bo mag di corta bo cabey, etc., pidiendo bo pa duna cuenta constantemente, isolando bo di bo famia y/of amigo/anan of tumando desicionnan pa bo sin bo permiso, ta demostra un caracter controlador, y ta rekeri ayudo profesional. Bo ta un adulto. Bo no a bai biba cu bo pareha pa e bira bo segundo mama of tata.

3. Falta di confianza:

Confianza ta fundamental den cualkier relacion. Na unda tin sospecho y acusacionnan constante, of bo tin cu biba ta duna cuenta y splica na placa chikito delaster un seconde di locual bo ta haciendo ora bo pareha no t’ey, bo pareha ta haciendo abo esun responsabel pa e por sinti sigur den e relacion. Esaki ta un indicacion di un problema mas profundo, cu mester wordo atendi. Si e confianza a kibra por completo a consecuencia di un infidelidad cu a wordo pordona, a largo plazo mester analisa sinceramente, si ta bal la pena sigui cu un relacion caminda ningun di dos tin paz ni trankilidad.

4. Conflicto sin resolve:

Cada relacion por tin su conflictonan, pero si e pareha constantemente ta evita conversacionnan profundo pa minimalisa e chance pa confrontacion of discusion, problemanan no ta wordo resolvi. Ora e pareha tin un patronchi di problemanan sin solucion, esaki a lo largo lo ocasiona rabia, resentimiento y hasta odio, cu ta caba cu cualkier sentimiento di amor cu por tin. Ta importante pa traha riba un manera efectivo pa comunica na unda ambos ta sinti liber pa expresa nan mes.

5. Falta di respet:

Falta di respet pa bo opinion, limitenan of espacio personal ta un señal significante di alerta. Respet mutuo ta esencial den cualkier relacion. Caminda un of ambos ta falta respet pa otro constantemente, ta ridiculisa of cherche otro, ta grita otro of papia palabra malo cu otro, sea ta den publico of den priva, obviamente nos ta papiando di un relacion toxico. Den e caso aki ta importante pa busca ayudo pa siña expresa na manera sano y mehora e trato den relacion.

6. Abuso verbal, emocional of fisico:

Cualkier forma di abuso ta absolutamente inacceptabel. Bo no a bai den un relacion pa wordo abusa. Si bo ta sintibo manipula, menaza of maltrata te na e punto cu bo no ta sinti bo safe of ta teme pa bo bida, ta esencial pa buska ayudo. Si ta abo ta e abusado den bo relacion, esaki ta conta pa bo tambe! Un hende sano no ta cana rond ta abusa di otronan. Busca ayudo profesional mas pronto posibel.

7. Falta di sosten:

Den un relashon saludabel, e partnernan ta tuma otro na serio y ta sostene e metanan y aspiracionnan di otro. Si un partner constantemente ta subestima, minimalisa of burla di e soñonan, ideanan of proposicionnan di su pareha, of constantemente e pareha ta sinti falta di apoyo di e otro, esaki a lo largo lo resulta den decepcion, resentimiento y insatisfaccion den e relacion.

8. Isolacion for di famia y amigo/anan:

Como adulto ta saludabel pa tin interaccion social cu otronan cu no ta bo pareha. Un relacion sano ta duna bo e espacio pa comparti cu bo famia y amigo/anan sin cu bo pareha necesariamente mester di ta presente. Conseho entre pareha semper ta di aprecia, pero ora un pareha ta pone presion riba bo of ta isola bo of controla bo interaccionnan a base di menaza of manipulacion, obviamente e ta sinti su mes superior y cu e autoridad pa dicidi pa bo. Esaki ta un red flag fuerte cu ta hole: Narcista.

9. Critica constante:

Feedback constructivo, y reclamo pa comportacion indesea, ta normal den cualkier relacion sano, na unda claramente bo kier pa cos bai bon, pero critica constante, principalmente si esaki ta sin base y unicamente cu e intencion pa hurt bo, kibra bo autoestima of rebaha bo como persona, ta perhudicial pa cualkier relacion. Un hende cu ta critica y bully otro constantemente ta projectando su frustracion interno ariba e otro. Red flag! Busca ayudo!

10. Falta di compromiso di un of ambos banda:

Si bo a dicidi pa drenta un relacion monogamo, bo sa, cu bo a compromete bo mes na intimidad cu un solo persona. Esaki ta un compromiso permanente, cu ta bin cu su sacrificio, pa dificil cu esaki por resulta a largo plaso. No biba ta pensa, cu abo ta e unico cu ta haciendo sacrificio pa bo relacion. Bo pareha tambe tin otro opcionnan cu e ta sacrificando na beneficio di e relacion. Zorg pa bo balora su sacrificio mescos cu e ta balora esun di bo. Nunca ta laat pa recapacita y siña aprecia.

Esakinan no ta e unico red flags cu bo lo por encontra den relacion. Y red flags no ta nifica automaticamente cu e relacion no tin futuro. Pero nan ta indica areanan cu ta rekeri di atencion pa e relacion por mehora y prospera.

Si bo ta preocupa tocante algun di e señalnan aki, relationship coaching lo por ta beneficioso pa bo.

Contact mi na: desiree@ds-lovecoach.com