NEW YEAR, NEW GOALS?

by:

Desiree Swaen

Certified Loveologist, Relationship & Life Coach

E momento ideal pa tuma accion

Cambio di aña semper ta un momento di refleccion. Hopi hende ta habri e aña nobo yen di energia, positivismo, y cu un cita cerca un coach. Nan ta cuminsa nan aña yen di animo pa traha riba nan mes, traha riba nan relacion, etc. No ta pornada, cu januari y februari ta e lunanan di mas druk na DS Love Coach. Pami ta sumamente excitante pa welcome y conoce clientenan nobo, ya cu cada cliente ta un mundo nobo pa explora.

Pero pakiko warda te na comienzo di un aña nobo pa bin cu resolucionnan, plannan y metanan nobo? Dicon durante aña e disciplina aki ta disminui y hopi hende ta bai back pa the 'same old'? E idea di transforma bo bida ta solamente un ilusion? Algo pa futuro? Un plan cu nunca lo yega na concretisacion? Kiko ta motivabo of demotivabo pa lanta mainta y bisa 'let's do it?'

Pa mayoria hende e contesta lo ta: AMI MES. Y esaki francamente ta e unico realidad. Ta abo so por dirigi e rumbo di bo bida. E unico hende cu por dal e stapnan den direccion di bo meta ta abo. Y mientras abo no ta suficientemente 'committed' esaki lo no sosode y bo soñonan y ideanan lo keda te ey. Bo comfort zone ta un lugar safe y trankilo, pero nada mas lo crece for di eynan.

Cua ta e momento ideal pa 'take action'? E unico momento ta AWOR. Ayera a pasa y mayan no ta sigur.

Cada hende ta un mundo ariba su mes

No tin reglanan restrictivo cu ta strobami di traha segun mi intuicion

Mi ta contento cu mi ta un coach. Den mi field, mi mannan no ta mara. Mi no ta traha a base di ‘one size fits all’. Cada cliente ta unico. Y cada pareha y relacion ta diferente. Durante e prome cita mi ta analisa entre otro, e manera con e cliente a wordo lanta, kiko ta e cosnan cu a afecte ora cu e tawata creciendo. Eventual traumanan of problemanan mental. Su creencianan (beliefs), dus kiko e ta kere den dje of no ta kere den dje, como tambe su cultura. Con e ta identifica su mes, y su orientacion sexual. Su lifestyle, gustonan y custumbernan personal. Su norma- y balornan. Kiko ta e cosnan importante y determinante pe. Kiko ta su proposito y mision den bida. Tin hopi cos cu ta ‘shape’ un hende. E hende completo ta consisti di diferente ‘ingrediente’. Y tur locual e cliente ta scoge pa comparti cumi, mi ta tene cuenta cune ora di trate. Mi no ta purba fit ningun cliente den un ‘box’. Dos hende nunca lo ta completamente mescos. Un experiencia cu un cliente por sirbi como un sorto di guia den casonan similar, pero nunca e lo bai ta 100% mescos cu e experiencia di e otro cliente. No por ‘cut and paste’ sin tene cuenta cu cada hende tin su cosnan apart y unico. Mester wak ariba nivel individual, kiko ta mas efectivo. Mi ta uza mi conocemento den area di coaching y counseling, mi observacionnan y principalmente mi intuicion pa determina e mihor approach pa e cliente. E approach aki ta wordo verifica cu e cliente a base di preguntanan clave cu mi ta hacie. E cliente no mester perocupa cu e lo wordo husga of labeled. Como ser humano ami no ta considera mi mes superior, pues mi no tin e derecho ni e autoridad pa husga otro ser humano. Y labeling den mi concepto ta un forma di sabotahe. Asina cu bo bai over na label un cliente, e lo bai den ‘victim mode’ y ta net esey lo stroba e acceso na su inner power pa efectua cambio y logra su metanan.

Mantencion ta importante

Continuing education ta mantenemi ´in top shape´

Prome cu mi a bira coach, mi tawata un abogada (ironicamente, tambe encarga cu separacion y diviorcio) y entrepeneur. Pues, mi tawata studiá den areanan di ley y business. Na 2015 mi a topa riba You Tube cu un TED Talk di e therapista di pareha Esther Perel, cu a impactami, hibando mi back na tempo cu como abogada, mi tawata encurasha clientenan pa pense bon prome cu nan dicidi di divorcia. Den un ‘aha!’ moment, mi a haya mi ‘calling’ pa bira relationship coach. E momento ey mi tawata tin 42 aña, y pues, cu suficiente experiencia propio den bida, carrera y relacion. Sin embargo, mi tawata falta conocemento den e area di psychologia, tanto personal como di relacion. Pesey mi a opta pa studia y certifica mi mes den entre otro relationship coaching, bereavement coaching y spiritual coaching. E meta pami tawata, pa haya e base di conocemento profesional den areanan cu por ta importante pa mi concepto, yama: DS Love Coach. Despues cu ya mi tawata trahando como coach mi a certifica mi mes den life coaching, sex coaching y counseling pa completa mi concepto.

Recientemente mi a lanta un online school yama: Love & Life Acacemy cu ta ofrece acceso publico (21+) na cursonan profesional y di self-help, den area di amor, relacion y intimidad.

Semper tin algo nobo pa siña y ami ta kere den continuing education, principalmente mirando e hecho cu mi ta eherce un profesion cu ta evoluciona constantemente y ta impacta bida y relacion di hende. Learning is growing, y mi ta kere firmemente den keda inverti placa y tempo den seminarionan, webinars, workshops, cursonan y tin bes asta programanan completo, na unda mi por siña algo nobo cu por yudami innova y mehora mi servicio. Pami ta importante pa haya informacion di diferente angulo y ‘tools’ cu mi por uza na beneficio di e cliente. Mi ta ‘pick and choose’ for di tur e diferente fuentenan cu mi tin, propone na e cliente y aplica locual nos ta kere cu den un caso particular lo por yud'e. Pasobra after all, that’s what it’s all about.

E cliente semper ta central

Mi creencianan, mi lifestyle, mi principionan, mi opinion, etc. no ta relevante ora ta trata di coaching.

Ami por ehempel, no ta un persona religioso. Mi no ta un persona cu ta lesa bijbel ni bai misa. Mi no ta haya necesario pa congrega, mas bien mi ta prefera solitud. Mi ta kere den un ser supremo pero mi no ta haya necesario pa tin guia ni un intermediario pa yega na dje. Mi ta haci uzo di meditacion y otro formanan directo pa comunica cune. Pero na momento di coach un cliente, esaki no ta importante. Si e cliente si ta un persona religioso, y cu ta bai su misa, ami ta respeta esey, y mi lo opta pa stimule pa resa, lesa su bijbel, bai misa y uza su fe como sosten pa su progreso, en bes di trata na impone mi creencia personal ariba dje. Si un pareha ta opta pa un relacion habri, nos lo bai explora e opcion ey, y e hecho cu ami ta den un matrimonio felis y monogamo pa 20 aña ta irrelevante. Si un pareha homosexual acudi na mi persona, e hecho cu ami ta heterosexual no ta haci un diferencia. Mi no lo bai husga nan ni nenga di ricibi nan pa motibo di nan orientacion sexual. Den e sentido aki mi ta open y flexible y mi ta realisa cu e cliente ta central, e cliente ta dirigi e proceso y e cliente ta e experto den su propio bida y/of relacion. Ta cuestion di guia e cliente mediante preguntanan strategico, pa recobra e potencial interno cu e tin. Tur cambio y logro mester wordo atribui na e cliente, pero tambe tur e responsabilidad pa cambio y logro ta cai ariba e cliente.

Coaching como metodo preventivo

Coaching ta un metodo apart y hopi efectivo cu por wordo uza preventivamente.

No ta imposibel pa drecha un relacion, no matter con cerca bo ta di un separacion. Cu bon boluntad, pasenshi, hopi disciplina y dedicacion esaki semper por wordo logra, pero e caminda pa cana lo bai ta largo. E no ta bai logra di awe pa mayan y sigur no den un solo cita. Na unda tin un acumulacion di issues pa resolve, cada issue ta tuma su tempo. Ami semper ta ilustre den forma di un mata. Bo tin e raiz di e problema, y si esaki no wordo corta na su momento, e ta sigui crece den diferente direccion, produciendo un mata cu taki y miles di blachi. Un cierto momento e ta escala y bira asina grandi cu e ta parce algo cu bo no por domina mas. Haciendo uzo di e metodo preventivo di coaching na un momento mas tempran posibel, bo por preveni esaki. Una vez cu e problema a bai fo’i man ta hopi mas dificil y ta rekeri hopi mas esfuerzo, perseverancia y recurso financiero pa yega back na e situacion ideal.

CONSEHO

Mescos cu Valentinesday no ta e unico dia pa demostra amor, comienso di aña no ta e unico momento pa tuma accion.

No sinta warda demasiado. Acudi tempran. T’abo so por cambia bo realidad.

Danki pa lesa.

DS