FROM SHY GIRL TO SEXPERT

Picture by ARTN Photography

Varios bes mi sa tende 'via-via' for di hendenan conoci, cu “otronan” a puntra of remarca "ta con net Desi por a bira un 'sex coach'?" No tin duda, cu sex ta hunga un rol importante den mayoria hende nan bida y relacion. Sin embargo, tanto mi titulo como mi trabou di coach den ramo di amor, relacion y intimidad ta hopi mas amplio. Pero, laga nos bai back un rato den tempo pa wak con e parti aki a desaroya...

"...E tawata un hende asina keto y verlegen".... Hasta mi a yega di tende cu mi tawata un hende "zwak"… Yes, I remember that super shy, introverted, bullied girl who didn't dare to speak up or defend herself... Wel...

E cambio aki no a tuma lugar di un dia pa otro. Despues di a funciona pa 10 aña como abogada, tratando entre otro casonan di separacion y divorcio, mi a descubri cu mi mision den bida no tawata pa separa parehanan, sino pa haci tur locual ta na mi alcance pa trata na uni nan. Na juli 2016 mi a haya mi 'calling' cu a hibami den e ramo di coaching di relacion. Tanto e prome estudio cu mi a haci via e instituto Hulandes CIVAS (HBO Relatiecoach) como mi estudionan siguiente via World Coach Institute, U.S.A. (Certified Relationship, Bereavement and Spiritual Coach), tawata inclui informacion basico y hopi conservativo tocante sexualidad. Como un persona sumamente "leergierig" cu gusta inverti den conocemento, principalmente pa por yuda mi clientenan na un manera responsabel y profesional, pami esaki no tawata suficiente. Mi a sigui cu specialisacionnan mas profundo den area combina di spiritualidad y sexualidad, cu cual mi a obtene e titulonan di Tantra Sex Teacher y Certified Master Sexpert na aña 2019.

Esaki a sosode na mesun momento cu mi tawata co-host hunto cu Julisa Hoevertsz e programa After Dark ariba Facebook live. After Dark tawata un programa innovativo den cual nos tawata trese topiconan padilanti cu e intencion di habri e conversacion tocante sexualidad y promove intimidad entre pareha. Na e momento ey e tipo di conversacionnan aki no tawata wordo hiba ainda den publicidad na Aruba. Principalmente como hende muher, nos a sinti un yamada fuerte pa trese e topiconan aki na luz di dia pa normalisa locual en realidad ta un acto completamente natural. No solamente Julisa, kende tawata tin e corahe pa bin cu un programa, e tempo ey sumamente controversial, pero tambe e episodionan ariba nan mes, a challenge mi pa haya sa mas pa por domina e materia y trese informacion up-to-date y corecto pa nos audiencia. Mi tin cu admiti cu mi desicion pa sigui studia y haya conocemento profundo tocante entre otro sicologia, anatomia, sexualidad humano, deseo, pasion, placer y tecnicanan, a yuda hopi pa baha e nivel di berguensa cu ami mes a lanta cune. Como un mucha muher cu un abuela, conoci como 'pilar di misa' y educa na un scol catolico den porta di misa, wel... ya bo por imaginabo. Pero ora bo ta compronde con un cos berdaderamente ta hinca den otro, bo por djis hari y laga los di tur e fabulanan cu a wordo hinca den bo cabes. Ainda mas importante cu e conocemento adicional ariba su mes, tawata e proceso sicologico y mental sumamente profundo cu mi a scohe pa yuda y prepara mi mes (shadowwork) y cu a hibami na descubri ken mi ta realmente.

E proceso mental aki a ponemi realisa hopi cos. Entre otro:

• cu e gevoel di berguensa tocante sexualidad no ta algo inherente na mi como persona, pero a wordo implanta for di chikito den mi door di otronan, cu e intencion di protegemi pa no bai den ‘mal caminda’;

• cu aunke ainda esaki no ta convencemi, kizas na su momento e por tawata un metodo efectivo, pues el a logra hinca e miedo necesario den mi, pa evita cu mi a haci ‘fout’;

• cu como adulto mi a puntra mi mes varios bes ki funcion e berguensa aki tin eigenlijk y si e no ta mas bien un forma di manipulacion;

• cu como hende muher mescos cu hopi otronan, for di chikito mi a wordo programa door di sociedad en general, cu e mision pa ta un "mama" (hunga cu wieg, popchi, tetero etc.) "ama di cas" y "casa" (preferiblemente keto, sumiso, servicial y obediente) y pa 'tone down' y sconde mi poder femenino y sexual pa no 'provoca hende homber';

• cu ami tin e capacidad pa ta mi mes y tuma desicionnan independiente tocante mi curpa y mi sexualidad y e rumbo cu ami kier hiba mi bida, sin cu esaki necesariamente tin di afecta otronan.

• cu gevoelnan di deseo y placer, no ta cosnan ‘malo’ ‘perverso’ of ‘peligroso’ cu automaticamente ta dominami of controlami, pero ta gevoelnan humano, cu ami por maneha na un manera racional, tanten cu mi ta consciente di nan y ta accepta nan como parti di mi naturalesa;

• cu ami mes a experiencia con e berguensa aki a infiltra den mi relacionnan anterior y tambe den mi matrimonio, den cual mi a hiba cumi e miedo implanta, cu tawata traha mas bien contra-productivo y a pone cu mi tawata emocionalmente blokia, reserva y sera pa intimidad cu mi pareha;

• cu den mi experiencia como coach di relacion mi a bin ripara cu no ta ami so a sintimi asina, pero hopi hende, mayoria bes hende muher, regularmente ta sinti e mesun gevoelnan aki di inhibicion y di no por habri nan mes completamente pa experiencia e intimidad real y placer completo cu nan pareha;

• cu aunke tin hende ta kere cu no ta asina, intimidad sexual ta algo sumamente importante pa mantene e coneccion (bonding) y compromiso (commitment) den un relacion di pareha.

• cu si e blog aki ta ponebo sinti nervioso of incomodo, kizas por ta ora pa bo bishita un coach...?

Jokes aside, e parti aki di mi trabou como coach di amor y relacion ta uno di sumo importancia pa locual ta trata desaroyo humano, tanto ariba nivel personal como di relacion. E no ta un simpel titulo cu ta wordo uza pa publicidad of pa yama atencion. E ta un tarea real ariba nivel profesional. El'a cambia mi bida y di hopi otronan, y ta transformando relacionnan di parehanan cu nunca a sinti nan mes liber pa comunica tocante sexualidad.

• E ta nifica trese parehanan mas cerca di otro y encurasha nan pa habri nan mes pa conversacionnan ariba un nivel hopi mas profundo sin mester di tin miedo di e reaccion di otro.

• E ta nifica durf di papia di detayes sumamente intimo, dunando e espacio na e pareha pa duna y haya informacion for di otro, incluyendo deseonan, expectativanan y necesidadnan y otro temanan cu nunca antes a wordo toca.

• E ta nifica ta habri pa reconoce mi propio fayonan, y acepta mi mes como e ser humano imperfecto cu mi ta, pa asina mi por compronde y demostra empatia pa otronan en bes di husga nan.

Mi trabou ta mi proposito, mi inspiracion y mi pasion.

And I'm not retiring until I'm dead. Danki pa bo atencion,

Desiree Swaen Certified Relationship & Love Coach

@ DS Love Coach

UPDATE: Pa haya un bista tocante mi trabou durante mi prome 5 aña como coach di amor, relacion y intimidad, mi ta invitabo pa lesa mi buki Confessions to a Love Coach, cu recientemente a wordo publica ariba Amazon y ta obtenibel den formato di ebook (Kindle) y paperback cu tambe por wordo besteld via DS Love & Life Store ariba e facebook page aki y tambe na De Wit Van Dorp: www.dewitvandorp.com